"Manchester Yunayted" murabbiylar shtabi a’zosi Darren Fletcher APL doirasida "Brentford"ga (2:1) qarshi o‘yinda hakam bilan to‘qnash kelgani uchun diskvalifikasiya qilinishi mumkin.
"Manchester Yunayted" murabbiylar shtabi birinchi bo‘lim oxirida "Brentford" urgan goldan juda g‘azablandi. Bosh hakam Samuel Barrott Metteys De Ligtni boshidagi qonni to‘xtatish uchun shifokorlar oldiga jo‘natdi va "qizil iblislar" himoyachisi maydonda bo‘lmaganida, burchak to‘pini Itan Pinnok yakunladi.
"MYU" bosh murabbiyi Erik Ten Xag va uning yordamchisi Rud Van Nistelroy o‘zlarining noroziliklarini bildirish uchun sariq kartochka oldilar, Fletcher ham o‘z noroziligini namoyish etdi.
Tanaffus hushtagidan so‘ng Fletcher Barrott bilan gaplashishni talab qilib, to‘rtinchi hakam Gevin Uordga ergashdi.
The Independent nashri xabariga ko‘ra, Barrot dushanba kuni o‘yindan keyingi hisobotni taqdim etadi, uni ko‘rib chiqqandan so‘ng, FA Fletcherga qarshi ayblovlar qo‘yishi mumkin.
