Toshkentdagi “Humo arena” majmuasida o‘tayotgan aralash jang san’ati turlari (MMA) bo‘yicha yoshlar va kattalar o‘rtasidagi jahon chempionatining chorak finalida O‘zbekiston terma jamoasining 41 nafari yarim final yo‘llanmasi uchun kurash olib bordi.

Ular orasida vazni 93 kg. bo‘lgan Shamshod Shukurov Angola vakili Anderson Guveiyani ochkolar hisobida yengdi. 97 kg. vazn toifasidagi bellashuvlarda Asrorbek Anvarjonov qozog‘istonlik Mels Shilmurzayevni muddatidan avval yenggan bo‘lsa, ushbu vazndagi ikkinchi sportchimiz Islombek Qodirov bolgariyalik Jorji Xristovni 2-raundda texnik nokautga uchratib, yarim final yo‘llanmasini qo‘lga kiritdi. Vazni 65,8 kilogrammgacha bo‘lgan Zafar Rashidov armanistonlik raqibi Arusxanyan Narekni ilk raundda texnik nokautga uchratdi. 56,7 kg. vaznda mamlakatimiz sharafini himoya qilgan Firdavs Hayitmatov portugaliyalik Mario Ferreyra ustidan hakamlarning yakdil qaroriga ko‘ra g‘alaba qozondi.

Shu tariqa, kun davomida o‘tkazilgan murosasiz bahslar yakuniga ko‘ra, O‘zbekiston terma jamoasining 29 nafar MMA ustasi o‘z vazn va yosh toifasida yarim final yo‘llanmasiga ega bo‘ldi. Endi ular bugun so‘nggi hal qiluvchi finalga chiqish uchun bellashadi.