«Olimpik» — «Bunyodkor» uchrashuvidan (0:1) so‘ng mezbonlar ustozi Denis Korostichenko matbuot anjumanida ishtirok etdi.

«Bu bitta gol hal qiladigan bahslardan edi. Ikkala jamoa Superligada jon saqlab qolish uchun kurashdi. «Bunyodkor» gol urdi va g‘alaba qozondi.

— «Olimpik» birinchi bo‘limda «Bunyodkor«ga qaraganda yaxshiroq harakat qildi, ammo ikkinchi taymda zaxiradan maydonga tushganlar o‘zini ko‘rsata olishmadi, «Bunyodkor»da esa aksincha. Jamoani zaxirasi juda kuchsiz. Jon saqlab qolish uchun motivasiya topish qanchalik qiyin bo‘lyapti?

— Rostdan ham har o‘yin motivasiya topishga qiynalyapmiz. Bugun ikki asosiy futbolchimiz betobligi tufayli maydonga tushmadi va bu bizga ta’sir qildi. Zaxiradan bahsga qo‘shilganlar safida Oybek O‘rmonjonov biroz sust harakat qildi, ammo u hali yosh, qolganlar yomon harakat qilishmadi. Demak, «Bunyodkor» zaxirasi biznikidan kuchliroq.

— «Olimpik» so‘nggi turda «Surxon" bilan o‘ynaydi. Jamoada ligada jon saqlab qolish uchun imkoniyat bor. Bu bahs haqida nima deya olasiz?

— Bugun yutganimizda hammasi hal bo‘lardi, buyog‘iga barchasi o‘zimizga bog‘liq emas. Albatta, g‘alaba uchun harakat qilamiz.