Tailandda bo‘lib o‘tgan Osiyo chempionatida oltin medalni qo‘lga kiritgan o‘zbekistonlik bokschi Xavasbek Asadullayev qo‘pol qoidabuzarlik uchun diskvalifikasiya qilindi. Bu haqda Osiyo boks konfederasiyasi xabar berdi.

71 kilogrammgacha bo‘lgan vazn toifasida Ispaniyadagi Boxam turniri g‘olibi Xavasbek Asadullayev va jahon chempionatining uch karra bronza medali sovrindori qozog‘istonlik Ablayxon Jusupov finalda to‘qnash keldi. O‘zbekistonlik jangchi jang vaqtida raqibining yelkasini tishlab oldi.

Qozog‘iston boks federasiyasining noroziligidan so‘ng elit boks bo‘yicha Osiyo chempionati texnik delegati irlandiyalik Sadi Daffi xonim qoidani qo‘pol ravishda buzgani uchun Xavasbek Asadullayevni diskvalifikasiya qilishga qaror qildi.

“Qoidalarga ko‘ra raqibni tishlash deb tasniflangan ushbu qoidabuzarlik jang davomida hakam tomonidan o‘tkazib yuborilgan, ammo keyinroq aniqlangan. Reglamentga ko‘ra, agar bokschi biron-bir sababga ko‘ra diskvalifikasiya qilinsa, Ablayxon Jusupov avtomatik tarzda diskvalifikasiya sabab jang g‘olibi deb e’lon qilinadi”, deyiladi xabarda.

Turnir yakuniga ko‘ra O‘zbekiston 8 ta oltin, 2 ta kumush va 1 ta bronza medalini qo‘lga kiritdi. Keyingi o‘rinlarda Qozog‘iston (4−6−1) va Tojikiston (1−1—3).