"Yuventus"dan ijaraga olingan "Lasio" yarim himoyachisi Nikolo Rovella faoliyatini Angliyada davom ettirishi mumkin.
23 yoshli futbolchini qishki transfer oynasida yarim himoyachi pozisiyasini mustahkamlashga umid qilayotgan "Manchester Siti" maqsad qilib qo‘ymoqda. Il Messaggero xabariga ko‘ra, "shaharliklar" italiyalikning transferi uchun taxminan 40 million yevro to‘lashga tayyor.
Nikolo Rovella ushbu mavsumda "Lasio" safida 23 ta o‘yinda maydonga tushib, 2 ta golli uzatmani amalga oshirgan. O‘tgan yilning noyabrida futbolchi Italiya terma jamoasida Belgiyaga qarshi Millatlar ligasi o‘yinida debyut qilgan.
