"Bavariya" yarim himoyachisi Jamol Musiala klub bilan yangi shartnoma borasida kelishib olishga yaqin turibdi.

Futbolchi va uning vakillari shartnoma fevraldan kechiktirmay imzolanishi kerakligiga ishonch bildirmoqda. Operasiyani osonlashtirish uchun Musiala allaqachon moliyaviy talablarini 4-5 million yevroga kamaytirgan. 21 yoshli futbolchi hozirda yiliga 25-26 million yevro maosh talab qilmoqda, deya xabar beradi jurnalist Florian Plettenberg. Hujumkor yarim himoyachining daromadi ko‘p jihatdan uning o‘yinlariga bog‘liq bo‘ladi va shartnomada turli uzoq muddatli bonuslar ham bo‘ladi - masalan, "Oltin to‘p"ni qo‘lga kiritish uchun.

Kompensasiya to‘lash bo‘yicha qaror hali qabul qilinmagan. Shuningdek, Jamol Musiala 2029 yoki 2030 yilgacha shartnoma imzolamoqchi ekanligi ma’lum. U boshqa klublar bilan muzokaralar olib bormayapti.