"PSJ" bosh murabbiyi Luis Enrike Chempionlar ligasining 7-turida "Manchester Siti" bilan bo‘ladigan o‘yin va Xosep Gvardiola bilan bo‘ladigan uchrashuv haqidagi taxminlari bilan o‘rtoqlashdi.
Olti turdan keyin "Siti" turnir jadvalida 24-o‘rinda, "PSJ" esa 26-o‘rinda bormoqda.
"Bu juda muhim o‘yin, unga hamma tayyor bo‘lishi kerak. O‘ylaymanki, ikkala jamoa ham o‘zlarining eng zo‘r qurollarini ishga solishga harakat qilishadi.
Chempionlar ligasining yangi formati bilan hech kim “Manchester Siti” va “PSJ”ning qayerga kelishini oldindan aytib bera olmadi. Keyingi bosqichga chiqish uchun qancha ochko olishimiz kerakligini hali bilmaymiz, balki buni shu turdan keyin bilib olarmiz.
Agar Pep Gvardiola va meni bir narsa belgilaydigan bo‘lsa, bu ikkalamiz ham hujumkor futbol o‘ynashni yaxshi ko‘ramiz.
Umid qilamizki, qiyin bo‘lishini bilsak-da, tribunalarimiz qo‘llab-quvvatlagan holda yaxshiroq o‘ynay olamiz. Ertangi o‘yinni ajoyib futbol o‘yini bo‘lishi uchun bizda hamma narsa bor. Eng yaxshi jamoa g‘alaba qozonsin, umid qilamanki, bu "PSJ" bo‘ladi", - deya Enrikening so‘zlarini keltiradi klub matbuot xizmati.
Jamoalar o‘rtasidagi o‘yin bugun, 22 yanvar kuni Parijda bo‘lib o‘tadi.
