La Liga kelasi mavsumda Chempionlar ligasida 5 ta jamoa ishtirok etish imkoniyatiga ega bo‘lishi mumkin. Ispaniya chempionati UYEFA reytingida ikkinchi o‘rindan bor-yo‘g‘i 0,018 ochko orqada.

"As" nashri ma’lumotiga ko‘ra, La Liga UYEFA reytingida 13,357 ochko to‘plagan va ikkinchi o‘ringa juda yaqinlashgan. Bu o‘rin 5 ta jamoani Chempionlar ligasiga chiqish imkonini beradi. Hozirda Italiyaning A Seriyasi (13,375 ochko) ikkinchi o‘rinda, farq esa bor-yo‘g‘i 0,018 ochkoni tashkil qiladi.

Reyting yetakchisi 15 ochko bilan APL hisoblanadi.

Shuningdek, La Liganing reytingi oshishiga joriy mavsumda «Barselona» va «Atletiko»ning Chempionlar ligasidagi muvaffaqiyatli ishtiroklari sabab bo‘lgani ta’kidlanadi. «Ko‘k-anorranglilar» «Benfika»ni mag‘lubiyatga uchratib, 1/8 finalga chiqishni kafolatladi va hozirda umumiy bosqich jadvalida ikkinchi o‘rinda turibdi. «Atletiko» esa uchinchi o‘rinni egallamoqda.