4 fevraldan 5 fevralga o‘tar kechasi Fransiya kubogining 1/8 final bosqich uchrashuvi bo‘lib o‘tdi. Unda «Le-Man» va «Pari Sen-Jermen» jamoalari o‘zaro to‘qnash kelishdi. Ushbu bellashuv Fransiyaning Le-Man shahridagi «Stad Mari-Marvingt» stadionida bo‘lib o‘tdi. Uchrashuv 2:0 hisobida mehmonlar — «PSJ» foydasiga yakunlandi. Shu tariqa, «PSJ» musobaqaning 1/4 finaliga yo‘l oldi.  

Uchrashuvning 25-daqiqasida fransuz vingeri Dezire Due hisobni ochdi. Unga golli uzatmani portugaliyalik hujumchi Gonsalu Ramush amalga oshirdi. Ikkinchi gol esa yana bir fransuz vingeri Bredli Barkola tomonidan urildi. Unga assistni portugaliyalik chap qanot himoyachisi Nunu Mendesh berdi.  

«PSJ»ning gruziyalik yangi futbolchisi Xvicha Kvarasxeliya ilk marta to‘liq 90 daqiqa o‘ynadi.

Bundan tashqari, «PSJ» himoyachisi Presnel Kimpembe 23 oylik tanaffusdan so‘ng ilk bor maydonga tushdi. U so‘nggi marta 2023 yil 26 fevral kuni maydonga tushgan bo‘lib, og‘ir jarohati tufayli uzoq muddat o‘ynay olmagan edi.

Eslatib o‘tamiz, Fransiya Kubogining 1/8 finalida «Brest» va ikkinchi divizion sensasiyachisi «Dyunkerk» jamoalari ham keyingi bosqichga yo‘l olgan edi.

Fransiya Kubogi. 1/8 final
Le-Man - PSJ - 0:2
Gollar:  0:1 — Dezire Due, 25-daqiqa (assist: Gonsalu Ramush), 0:2 — Bredli Barkola, 71-daqiqa (assist: Nunu Mendesh)