"Manchester Siti" darvozaboni Ederson o‘z jamoadoshi, o‘zbekistonlik himoyachi Abduqodir Husanovning Angliya chempionati doirasidagi "Nyukasl"ga qarshi o‘yini (4:0) haqida fikr bildirdi.
"Bugun u juda va juda yaxshi o‘ynadi, ayniqsa uning yoshligini, ingliz tilida gapirolmasligini va rus tilida muloqot qilishini inobatga olsak. U uchun aloqa qilish qiyin. Lekin u harakat qilyapti, ingliz tili darslariga qatnayapti, bizni tinglayapti va men u uchun juda xursandman, — dedi Ederson o‘yindan so‘ng.
Edersonning o‘zi esa "Nyukasl"ga qarshi uchrashuvda golli uzatma amalga oshirib, Angliya Premyer-Ligasida darvozabonlar orasida eng ko‘p assist bergan futbolchi sifatida rekord o‘rnatdi — uning karyerasidagi assistlari soni oltitaga yetdi.