Farg‘ona shahridagi “Samo” sport majmuasida 15 fevral kuni professional boks oqshomi tashkil etildi.

Kechaning markaziy jangida o‘zbekistonlik charm qo‘lqop ustasi, IBF kamari uchun sobiq da’vogar Shohjahon Ergashev ugandalik Junju Pauerga qarshi ringga ko‘tarildi. Yarim o‘rta vazn toifasida 12 raund etib belgilangan jang 1-raunddayoq Shohjahon Ergashevning nokautli g‘alabasi bilan yakunlandi. Raund mobaynida o‘zbekistonlik bokschi raqibini bir necha bor nokdaun holatiga ham tushirib qo‘ydi.

Shu tariqa, Shohjahonning professional boksdagi rekordi 25-2 ko‘rinishiga keldi. U 27 ta jangning 25 tasida g‘alabaga erishgan (22 ta jangda g‘alaba muddatidan oldin qo‘lga kiritilgan). 2 ta jangda mag‘lub bo‘lgan (1 ta jangda muddatidan oldin taslim bo‘lgan).

Ergashev so‘nggi mag‘lubiyatini 2024 yilning 24 iyulida qabul qilib olgan. Amerikalik Julian Smitga qarshi ringga ko‘tarilgan bokschi hakamlar qaroriga ko‘ra (95-94, 95-94, 94-95) mag‘lub bo‘lgandi.