Fransiyaning Parij shahrida shaxmat bo‘yicha Freestyle Chess Grand Slam Tour 2025 turniri bo‘lib o‘tmoqda. Unda o‘zbekistonlik Nodirbek Abdusattorov ham ishtirok etmoqda.

Birinchi kungi bahslarda 4 g‘alaba, 2 durang qayd etgan shaxmatchi 5 ochko bilan 2-o‘rinni egallab turgan edi. 8 aprel kuni ikkinchi kungi bahslar o‘tkazildi. Unda Abdusattorov Arjun Erigaisi, Magnus Karlsen va Rameshbabu Pragnanandha kabi shaxmatchilarga imkoniyatni boy bergan bo‘lsa, hindistonlik amaldagi jahon chempioni Gukesh Dommaraju ustidan g‘alaba qozondi. Hikaru Nakamuraga qarshi bahsda tomonlar durang o‘ynab, 0,5 ochkodan bo‘lishib oldi.

Saralash bosqichi yakunlariga ko‘ra, 5 ta g‘alaba, 3 ta durang va 3 ta mag‘lubiyat qayd etgan Nodirbek turnir jadvalida 5-o‘rinni egalladi va keyingi bosqichga yo‘l oldi. Ta’kidlash kerakki, 1—8-o‘rinlarni egallagan sportchilar chorak final yo‘llanmasiga ega chiqishdi.

Turnir jadvalida dastlabki 4 o‘rinni qo‘lga kiritgan shaxmatchilar chorak finalda o‘ziga raqib tanlash imkoniyatiga ega bo‘lishadi. 9,10,11,12-o‘rin egalari 9-11 o‘rinlar uchun kurash olib borishadi.

2-kungi bahslar yakunlangach, 4 sportchi o‘ziga raqib tanladi. Unga ko‘ra, Nodirbek Abdusattorov chorak finalda dunyoning birinchi raqamli shaxmatchisi Magnus Karlsenga qarshi bahs olib boradi.

Chorak final juftliklari:

Magnus Karlsen — Nodirbek Abdusattorov
Yan Nepomnyashchiy — Vinsent Keymer
Fabiano Karuana — Maksim Vashe-Lagrav
Arjun Erigaisi — Hikaru Nakamura

Chorak finalning dastlab bahslari bugun, 9 aprel kuni o‘tkaziladi. Shaxmatchilar pley-off bosqichida "klassik" vaqt nazoratida o‘ynashadi. Ikki o‘yin natijasida durang qayd etilsa, blis formatida g‘olib nomi aniqlanadi. Unda ham g‘olib aniqlanmasa, "armagedon"ga murojaat qilinadi.