Yozda Sandro Vagner o‘z iltimosiga ko‘ra Germaniya futbol ittifoqini tark etadi. Bosh murabbiy Yulian Nagelsmann bilan kelishilgan holda, 37 yoshli mutaxassis Millatlar ligasining final to‘rtligidan so‘ng Germaniya terma jamoasi bosh murabbiyi yordamchisi sifatidagi faoliyatini yakunlaydi.
"Germaniya terma jamoasida yordamchi murabbiy sifatida ishlash men uchun katta sharaf edi. Men har doim bunday imkoniyatdan minnatdorman va buyuk murabbiylar jamoasi bilan birgalikda juda ko‘p yutuqlarga erishganimizdan faxrlanaman. Xususan, o‘z uyimdagi Yevropa chempionati men uchun unutilmas tajriba bo‘lib qoladi.
Ammo men tez orada keyingi qadamni tashlamoqchiman. Hech kimga sir emaski, mening katta orzum bosh murabbiy bo‘lish", - dedi Vagner.
Qo‘shimcha qilib o‘tamiz, Vagner 2023-yilning sentyabridan boshlab murabbiy yordamchisi sifatida ishlab kelmoqda.













