"Barselona" o‘z maydonida "Real"ni 4:3 hisobida yengdi. Natijada Xans-Diter Flik jamoasi chempionlikka yaqinlashdi. Endilikda peshqadam kataloniyaliklar ikkinchi o‘rindagi madridliklardan 7 ochko (82 - 75) oldinda bormoqda.

Oldinda yana uchta tur bor, ya’ni har bir jamoa yana to‘qqiz ochko to‘plashi mumkin. "Barselona" 14 may, chorshanba kuniyoq Ispaniya chempioniga aylanishi mumkin. Agar "Real" o‘z maydonida "Malyorka"ni mag‘lub etmasa, shunday bo‘ladi.

Agar "Real" g‘alaba qozonsa, "Barselona" keyingi kuni, 15 may kuni chempionlikni rasmiylashtirishi mumkin bo‘ladi. Buning uchun Flik jamoasi safarda "Espanyol"ni mag‘lub etishi kerak bo‘ladi.