"Bavariya" vingeri Leroy Sane amaldagi shartnomasi yakunlangach, Angliyaga qaytishi mumkin.
Avvalroq, 29 yoshli futbolchiga Londonning "Arsenal" va "Chelsi" klublari da’vogarlik qilayotgani, shuningdek, "Nyukasl" ham qiziqish bildirayotgani haqida xabarlar tarqalgan edi. FussballTransfers xabariga ko‘ra, yaqinda germaniyalik futbolchining xizmatlari "Tottenxem"ga taklif qilingan. Futbolchi "Bavariya" bilan tugayotgan shartnomasini uzaytirmasa, erkin agent sifatida yangi jamoasiga o‘tishi mumkin bo‘ladi.
Leroy Sane allaqachon Angliya Premyer-ligasida o‘ynagan: 2016 yildan 2020 yilgacha u "Manchester Siti" sharafini himoya qilgan va u yerdan 49 million yevro evaziga Myunxen superklubiga o‘tgan.













