Madridning "Real" klubi jamoaning bo‘lajak bosh murabbiyi Xabi Alonsoning Luka Modrich bo‘yicha so‘rovini qondirmadi.

Ispaniyalik murabbiy xorvatiyalik bilan ishlashni xohladi va klub faxriy bilan shartnomani yana bir yilga uzaytirishni talab qildi, biroq "qaymoqranglilar" bosslari rad javobini berishdi, deb yozadi Diario AS. "Real" yosh futbolchilarga umid bog‘lamoqchi. 39 yoshli xavbek erkin agentga aylanadi.

Luka Modrich "qirollik klubi"da 13 yil o‘tkazdi. Yulduz futbolchi madridliklar safida barcha musobaqalarda 590 ta o‘yinda maydonga tushib, 43 ta gol urgan va 95 ta golli uzatmani amalga oshirgan.