Angliya terma jamoasi bosh murabbiyi Tomas Tuxel "Tottenxem"ning Ange Postekogluni iste’foga chiqarish qarori haqida qanday fikrda ekanini aytdi.

"Shporlar" Yevropa Ligasida g‘olib chiqdi, ammo Premyer-ligada 17-o‘rinni egalladi. Londonliklar rahbariyati murabbiyni almashtirishni lozim topdi, bu haqda juma kuni ma’lum bo‘ldi.

"Bunday vaziyatlarda har bir murabbiyga hamdardlik bildiraman. O‘zim ham shunday ahvolga tushganman va buning dahshatli ekanini bilaman. Men Postekogluni juda hurmat qilaman, uning fe’l-atvori ajoyib. U "Tottenxem" bilan ikkinchi mavsumda sovrin yutishini aytdi va u haqiqatan ham buni uddaladi. Lekin ishimizning o‘ziga xosligi shunday. Biz natijalar va jamoaning rivojlanishi uchun javobgarmiz. Xohlaymizmi-yo‘qmi, ba’zida butun mas’uliyat murabbiy zimmasida bo‘ladi," - dedi Tuxel JCH-2026 saralashidan o‘rin olgan Andorraga qarshi o‘yin oldidan.