"Brentford" klubi bosh murabbiyi Tomas Frank klub rahbariyatiga "Tottenxem"ni boshqarmoqchi ekanligini rasman ma’lum qildi.
Bu haqda talksport yozmoqda. 51 yoshli daniyalik mutaxassis "shporlar" safidagi muvaffaqiyatli, ammo qisqa muddatli faoliyatidan keyin 6 iyun kuni iste’foga chiqarilgan Ange Postekoglu o‘rniga asosiy da’vogarga aylandi. Manbaga ko‘ra, Frankning vakillari allaqachon "Brentford" bilan shartnomani bekor qilish shartlari bo‘yicha muzokaralar olib borgan. Tovon puli summasi taxminan 9 million funtga baholanmoqda.
Postekoglu qo‘l ostida "Tottenxem" ko‘p yillar davomidagi ilk sovrinni qo‘lga kiritdi - Yevropa Ligasi finalida "Manchester Yunayted" ustidan g‘alaba qozondi (1:0). Frank "Brentford"ni 2018 yildan buyon boshqarib kelmoqda va o‘tgan mavsumda jamoani APLda 10-o‘ringa olib chiqdi.
