Markaziy hujumchi Artyom Dovbik yozgi transferlar vaqtida Rimning "Roma" klubini tark etishi mumkin. Bu haqda Calcio in Pillole xabar beradi.
Manbaga ma’lum bo‘lishicha, ukrainalik futbolchi bilan xayrlashish tashabbuskori "bo‘rilar"ning yangi bosh murabbiyi Jan Pyero Gasperini hisoblanadi. Dovbik italiyalik mutaxassisning rejalariga to‘g‘ri kelmayapti. Rimliklar allaqachon Bundesliga va APL klublari bilan Dovbikni sotish bo‘yicha dastlabki muzokaralarni o‘tkazgan.
Hujumchi Italiya chempionatining o‘tgan mavsumida 32 ta o‘yinda ishtirok etgan. 27 yoshli Dovbik 12 ta gol urdi va ikkita golli uzatmani amalga oshirdi. Uning bozor qiymati 30 million yevroga baholanmoqda.
