Chexiya poytaxti Pragada aralash yakkakurashlar (MMA) bo‘yicha Oktagon 72 turniri bo‘lib o‘tdi. Unda o‘zbekistonlik sportchi Mahmud Murodov co-main event — asosiy janglardan birida oktagonga ko‘tarildi.

Murodov ushbu bahsda mezbon jangchi Patrik Kinslga qarshi o‘rta vazn toifasida jang olib bordi. Ushbu to‘qnashuv Oktagon promoushenining vaqtinchalik chempionlik kamariga ega chiqish uchun o‘tkazildi.

To‘liq davom etgan jangda Mahmud Muradov raqibi ustidan to‘liq ustunlikka erishdi. Yakunda hakamlar bir ovozdan o‘zbekistonlik sportchining g‘alabasini e’lon qilishdi.

Shu tariqa, Mahmud Murodov Oktagon promoushenining o‘rta vazn toifasidagi vaqtinchalik chempion sifatida qayd etildi.

Ma’lumot uchun, bu Mahmud uchun ketma-ket beshinchi g‘alaba bo‘ldi. Mahmud Murodov bungacha 9 mart kuni Germaniyaning Shtutgart shahrida tashkil etilgan Oktagon 68 turnirida shveysariyalik Yasubi Enomotoga qarshi jang olib borib, ikkinchi raundning 40-soniyasida og‘ir nokaut evaziga g‘alaba qozongan edi.

Ma’lumot uchun, o‘zbekistonlik sportchi 2019—2024 yillar oralig‘ida UFC jangchisi sifatida dunyoning eng nufuzli ligasida olti marotaba ringga chiqib, to‘rtta g‘alaba va ikkita mag‘lubiyat qayd etgan.