Amerika Qo‘shma Shtatlarida futbol bo‘yicha klublar o‘rtasidagi jahon chempionatining guruh bosqich uchrashuvlari qizg‘in pallaga kirmoqda.

Musobaqaning “C” guruhidan o‘rin olgan “Boka Xuniors” va “Benfika” jamoalari to‘qnashuvi 2:2 hisobida durang bilan yakunlandi. Keskin va murosasiz o‘tgan ushbu o‘yinda uchrashuv bosh hakami meksikalik Sesar Ramos jami uch marta qizil kartochka ko‘rsatdi.

Shu tariqa mazkur uchrashuvdan so‘ng “S” guruhida “Bavariya” kechagi yirik g‘alabasidan so‘ng 3 ochko bilan birinchi pog‘onaga chiqib olgan bo‘lsa, bugungi o‘yinda durang natija qayd etgan “Benfika” va “Boka Xuniors” 1 ochkodan jamg‘arib, 2-3 o‘rinni egalladi. “Oklend Siti” esa so‘nggi o‘rinda qoldi.

“D” guruhida “Chelsi” klubi 2:0 hisobida "Los-Anjeles" klubini mag‘lub etdi. Guruhning ikkinchi bahsida “Flamengo” 2:0 hisobida “Esperans” jamoasidan ustun keldi. Ushbu o‘yin natijasiga ko‘ra, “Flamengo” va “Chelsi” 3 ochko bilan 1-2 o‘rinda qayd etilgan bo‘lsa, mag‘lub bo‘lgan "Los-Anjeles" hamda “Esperans” 3-4 o‘rinda qoldi.

Bugun, 17 iyun kuni “F” guruhida “Fluminense“ – “Borussiya Dortmund” jamoalari o‘zaro raqobatlashadi. Mamlakatimiz vaqti bilan soat 21:00 da boshlanadigan ushbu uchrashuvni hamyurtimiz Ilgiz Tantashev bosh hakam sifatida boshqarib boradi. Unga qanotlarda Andrey Sapenko va Timur Gaynullin yordam beradi. Guruhning ikkinchi o‘yini – “Ulsan” va “Mamelodi Sandaunz” klublari o‘rtasida kechadi. Bahs 18 iyun kuni tonggi 03:00 da start oladi.

Shuningdek, ertaga “E” guruhida “River Pleyt” – “Urava Red Daymonds”(00:00), “Monterrey” va “Inter” (06:00), “G” guruhida esa tarkibida Abduqodir Husanov bo‘lgan “Manchester Siti” va “Vidad” klublari o‘zaro raqobatlashadi. Ushbu uchrashuv 21:00 da bo‘lib o‘tadi.