Америка Қўшма Штатларида футбол бўйича клублар ўртасидаги жаҳон чемпионатининг гуруҳ босқич учрашувлари қизғин паллага кирмоқда.

Мусобақанинг “C” гуруҳидан ўрин олган “Бока Хуниорс” ва “Бенфика” жамоалари тўқнашуви 2:2 ҳисобида дуранг билан якунланди. Кескин ва муросасиз ўтган ушбу ўйинда учрашув бош ҳаками мексикалик Сесар Рамос жами уч марта қизил карточка кўрсатди.

Шу тариқа мазкур учрашувдан сўнг “С” гуруҳида “Бавария” кечаги йирик ғалабасидан сўнг 3 очко билан биринчи поғонага чиқиб олган бўлса, бугунги ўйинда дуранг натижа қайд этган “Бенфика” ва “Бока Хуниорс” 1 очкодан жамғариб, 2-3 ўринни эгаллади. “Окленд Сити” эса сўнгги ўринда қолди.

“D” гуруҳида “Челси” клуби 2:0 ҳисобида "Лос-Анжелес" клубини мағлуб этди. Гуруҳнинг иккинчи баҳсида “Фламенго” 2:0 ҳисобида “Эсперанс” жамоасидан устун келди. Ушбу ўйин натижасига кўра, “Фламенго” ва “Челси” 3 очко билан 1-2 ўринда қайд этилган бўлса, мағлуб бўлган "Лос-Анжелес" ҳамда “Эсперанс” 3-4 ўринда қолди.

Бугун, 17 июнь куни “F” гуруҳида “Флуминенсе“ – “Боруссия Дортмунд” жамоалари ўзаро рақобатлашади. Мамлакатимиз вақти билан соат 21:00 да бошланадиган ушбу учрашувни ҳамюртимиз Ильгиз Танташев бош ҳакам сифатида бошқариб боради. Унга қанотларда Андрей Цапенко ва Тимур Гайнуллин ёрдам беради. Гуруҳнинг иккинчи ўйини – “Ульсан” ва “Мамелоди Сандаунз” клублари ўртасида кечади. Баҳс 18 июнь куни тонгги 03:00 да старт олади.

Шунингдек, эртага “E” гуруҳида “Ривер Плейт” – “Урава Ред Даймондс”(00:00), “Монтеррей” ва “Интер” (06:00), “G” гуруҳида эса таркибида Абдуқодир Ҳусанов бўлган “Манчестер Сити” ва “Видад” клублари ўзаро рақобатлашади. Ушбу учрашув 21:00 да бўлиб ўтади.