O‘zbekiston futbol assosiasiyasi tomonidan "Iqtidorli murabbiylar" konferensiyasining dastlabki kunidan o‘rin olgan muhim tadbirlar bo‘lib o‘tdi. Ushbu konferensiya futbolda murabbiylar ta’limi sifatini oshirish, ularning malakasini zamon talablari asosida rivojlantirish va seleksiya tizimini takomillashtirishga qaratilgan.
Tadbirda mamlakatimizning barcha viloyatlaridan tashrif buyurgan bolalar futboli hamda klublar murabbiylari ishtirok etishib, bolalar-o‘smirlar va yoshlar futbolida murabbiylikdagi zamonaviy tendensiyalar yuzasidan fikr almashmoqdalar.
O‘zbekiston futbol assosiasiyasi birinchi vise-prezidenti Ravshan Ermatov ochilish marosimida futbolni rivojlantirishda ta’limning, ayniqsa murabbiylar ta’limining o‘rni, ular faoliyatini tizimli yo‘lga qo‘yish va ilmiy asoslangan yondashuv zarurligi haqida to‘xtaldi.
Murabbiy — futboldagi eng muhim shaxslardan biri. U nafaqat mashg‘ulot o‘tkazuvchi, balki kuchli psixolog va tarbiyachi ham bo‘lishi kerak. Murabbiylar doimiy izlanishi, bilimlarini oshirib borishi, o‘z ishiga ilm va tahlil bilan yondashishini bugungi kun futboli talab qilyapti. Bugungi kunda futbolimizda erishilayotgan yutuqlar ortida aynan sifatli murabbiylar ta’limi yotadi. So‘nggi yillarda hududiy akademiyalar faoliyati qaytadan ko‘rib chiqildi, "Football for Schools" loyihasi 1500 dan ortiq maktablarga kirib bordi, hududlardagi jismoniy tarbiya o‘qituvchilari va murabbiylarini bepul o‘qitish tizimlari yo‘lga qo‘yildi. Biroq oldimizda hali katta vazifalar turibdi. Tez orada foydalanishga topshiriladigan Milliy futbol markazida murabbiylar uchun zamonaviy o‘quv-uslubiy sharoitlar yaratiladi. Bu esa professional futbolchilarni yetishtirishda muhim zamin bo‘ladi.
Ishonamizki, Sizlar ham haqiqiy professional mutaxassis bo‘lib, o‘zbek futboli rivojiga doimiy hissa qo‘shib borasizlar" — dedi Ravshan Ermatov.
Konferensiyada O‘FA texnik direktori Gi Kiala futbolchilarning bosqichma-bosqich tayyorlanishi, raqamli texnologiyalardan foydalanish va psixologik hamda jismoniy tayyorgarlik masalalariga to‘xtaldi. Shuningdek, O‘zbekiston milliy terma jamoasi bosh murabbiyi Timur Kapadze, U-17 terma jamoasi ustozi Islombek Ismoilov va "Navbahor" jamoasi bosh murabbiyi Sergey Lushan o‘z tajribalari bilan bo‘lishishdi.
