Hujumchi Moyze Kin "Fiorentina"da yanada foydaliroq shartnomaga ega bo‘lishi mumkin, deya xabar bermoqda insayder Janluka di Marsio.
Italiya klubi rahbariyati futbolchi bilan yangi mehnat shartnomasi tuzib, maoshini jiddiy oshirmoqchi. Agar tomonlar kelishib olsa, u holda Moyzening maoshi yiliga to‘rt million yevroni tashkil etadi. O‘tgan mavsumda hujumchi 2,2 million ishlab topgan.
O‘tgan mavsumda Kin "binafsharanglilar"ning eng yaxshi to‘purari bo‘ldi. Hujumchi Florensiya jamoasining 44 ta o‘yinida qatnashib, o‘z hisobiga 25 ta gol va uchta golli uzatmani yozdirib qo‘ygan.
