"Real" yozda David Alaba bilan xayrlashmoqchi.

Iyun oyi oxirida 33 yoshli himoyachi yana jarohat olgani ma’lum bo‘lgandi. O‘yinchining chap oyog‘ining boldir muskuli shikastlangani aniqlandi.

2 mavsum oldin Alaba jarohatlari tufayli La Ligada atigi yettita o‘yin o‘tkazgan bo‘lsa, o‘tgan mavsumda 14 ta o‘yin o‘tkazdi.

Futbolchining amaldagi shartnomasi 2026 yilning iyunigacha mo‘ljallangan. U orqali yiliga 12,5 mln yevro maosh olishi taxmin qilinmoqda.

Vaziyatni inobatga olgan holda, klub yozgi transfer oynasida avstriyalik futbolchi bilan xayrlashib, maosh jamg‘armasi va aktivlarni bo‘shatish imkoniyatini ko‘rib chiqmoqda, deb yozadi As.

Ammo futbolchining o‘zi klubni tark etishga tayyor emas. Himoyachi shartnomani to‘liq ishlab chiqib, 2026 yilgi jahon chempionatiga qadar yaxshi formada bo‘lishni istamoqda.

Qayd etilishicha, masalaning yechimi futbolchining reabilitasiyasi va tiklanishiga bog‘liq bo‘ladi.