Italiyaning "Yuventus" klubi "Osasuna" himoyachisi Flavyen Boyomoni o‘z safiga qo‘shib olishga urinishi muvaffaqiyatsiz yakunlandi. Bu haqda Football Espana portali xabar bermoqda.
"Osasuna" rahbariyati "Yuventus"ga Boyomoni sotishdan bosh tortdi, chunki jamoa asosiy tarkibning yana bir muhim o‘yinchisini yo‘qotishni istamadi. Yaqinda jamoadan Bilbaoning "Atletik" klubi taklifini qabul qilgan Xesus Areso ketgan edi.
Kamerunlik Bonomo bir yil oldin "Valyadolid"dan 5 million yevro evaziga "Osasuna"ga o‘tgan edi. 23 yoshli markaziy himoyachi o‘tgan mavsumda klub uchun 40 ta o‘yinda maydonga tushib, 2 ta gol urdi.
Faqatgina "Yuventus" 25 million yevro tovon puli to‘lashga rozi bo‘lsagina, Bonomo jamoani tark etishi mumkin. Hozircha "keksa sinyora" bu mablag‘ni berishga tayyor ekanligi haqida hech qanday ma’lumot yo‘q.
