2025 yil 23–27 iyul kunlari Serbiyaning Zlatibor shahrida maktab o‘quvchilari o‘rtasida boks bo‘yicha Yevropa chempionati bo‘lib o‘tdi. Ushbu musobaqa vaqtida noxush holat yuz berdi: o‘zbekistonlik murabbiy Hamza Avezov hakam qaroridan norozi bo‘lib, ringga yugurib chiqdi va hakamga qo‘l ko‘tarmoqchi bo‘ldi.

Ushbu hodisaga Xalqaro boks assosiasiyasi (IBA) prezidenti Umar Kremlyov munosabat bildirdi. U Instagram sahifasida shunday dedi:

Do‘stlar, hakamlar adolatli bo‘lishi shart. Ular istaganini qilib yurishiga yo‘l qo‘ya olmaymiz. Shuning uchun bunday hakamlar boksdan butunlay chetlatiladi. Murabbiy ham xato qildi. Boshqacha yo‘l tutishi kerak edi. Lekin u o‘z shogirdini himoya qildi. Shuning uchun uni vaqtincha barcha musobaqalardan chetlatamiz. Sportda tartib bo‘lishi kerak. Kim qanday xato qilgan bo‘lsa, tegishli komissiyalar qaror chiqaradi. Xato qilgan hakamlarga qat’iy chora ko‘riladi. Biz toza va adolatli boks tarafdorimiz. Ba’zida shunday holatlar uchrab turadi, lekin ularni butunlay yo‘q qilishga harakat qilyapmiz.

Ma’lumot uchun, ushbu mojaro final jangida sodir bo‘lgan. Unda ozarbayjonlik bokschi Yusif Agakishiyev va serbiyalik Viktor Maystrovich bahs olib bordi. Murabbiy Avezov hakamning qaroridan jahli chiqib, jangni boshqarayotgan makedoniyalik hakam Stefan Subalevskiyga tashlandi.

Ma’lumotlarga ko‘ra, Hamza Avezov ilgari O‘zbekiston boks federasiyasining Buxoro viloyat bo‘limida ishlagan. Hozirda u Ozarbayjon terma jamoasida texnik direktor bo‘lib ishlamoqda.