O‘zbekiston Superligasining 17-turidan o‘rin olgan «Navbahor» – «So‘g‘diyona» (1:1) uchrashuvidan keyingi matbuot anjumanining birinchi qismida mezbonlar bosh murabbiyi Sergey Lushan ishtirok etib, OAV xodimlarining savollariga javob berdi.

— Bugungi o‘yin borasidagi fikringiz?

— Uchrashuv biz uchun juda qiyin kechdi. Ayniqsa, hujumda hech narsa o‘xshamadi. Bunga nima sabab bo‘layotganligini tahlil qilamiz. Mehmonlar ham ko‘p vaziyatlar yaratishdi, deya olmayman. Bugungi bahsda teng kuchli jamoalar kurashi guvohi bo‘ldik. Yakkakurashlar ko‘p bo‘ldi, balki yutmaganimizga maydon xalaqit bergandir, bir narsa deya olmayman. Shunday bo‘lsada, futbolchilarga rahmat aytdim.

— Ruslanbek Jiyanovning zaxiraga olinishiga nima sabab bo‘ldi?

— Chunki u biz kutgan o‘yinni namoyish eta olmadi. Jiyanov va Mirsaidov jamoamiz bilan asosiy yig‘inda bo‘lishmadi, ularning ikkisi deyarli mashg‘ulot o‘tkazishmadi. Bir oy hech nima qilmasdan faqat dam olishdi. Xuddi shuningdek, boshqa futbolchilar ham mashg‘ulotlarda to‘liq ishtirok etishmadi. Boltaboyev bir oyni hujjatlarini tayyorlash bilan o‘tkazdi. Xullas, hozirgi tarkibda mashg‘ulotda qatnashmagan 7-8 nafar o‘yinchi o‘ynayapti. Shuning uchun zo‘rg‘a durang qayd etayotganimizdan ham xursandman. Jamoada nima bo‘layotganini bilish uchun uning ichida bo‘lish kerak. Men jamoa ichida bo‘lganim uchun hammasini bilaman.

— «Navbahor» qatorasiga uchta o‘yindan buyon g‘alaba qozona olmayapti. Buning sababi nimada?

— Bu jamoaning funksional holati bilan bog‘liq. Birinchi davra oxirlarida 10 nafarga yaqin yoshlarni majburan asosiy tarkibga o‘tkazdik, chunki zaxiramizda hech kim qolmagandi. Mana hozir ko‘ryapsiz, yoshlar o‘zlarini ko‘rsatishga harakat qilishyapti. Biz reja bo‘yicha ishlashda davom etyapmiz. Albatta, aqllilar ham bor, bizga nima qilish kerakligini o‘rgatadigan. Lekin men ularga quloq solmayman.

— Bugungi muxlislik va performans sizga yoqdimi?

— To‘g‘risi, o‘yin paytida diqqat e’tiborimni faqat maydonga va futbolchilarning harakatlariga qarataman. Ba’zan baqirishadi, ammo men e’tibor bermayman, ba’zan tushunmayman ham. Muxlislik har doim jamoaga nisbatan bir xil bo‘lishi kerak. Yutganda qarsak chalib, yutqazganda so‘kish fan-klubning ishi emas. Bu muxlislik madaniyatiga umuman to‘g‘ri kelmaydi.

— Yangi kelgan o‘yinchilar haqida nima deya olasiz?

— Ularning jamoamizga kelganiga endi 10 kun bo‘ldi. Ozroq vaqt kerak, keyin ular ham o‘zlarini ko‘rsatadi. Bu yil bizga oson bo‘lmayapti, boshidagi 7 ta turni juda qiynalib o‘tkazdik. Men yangi kelganlarga to‘liq ishonaman.

— Ketganlarni ushlab qolsa bo‘larmidi?

— Ijaraga ketganlar bo‘ldi hamda ularni o‘zimiz qo‘yib yubordik. Kimgadir ko‘proq maosh taklif qilishdi va u ketdi. Bu normal holat. Yaxshi taklif bo‘lsa futbolchi ketadi.

— 25 avgust kuni yana «So‘g‘diyona»ga qarshi bahs olib borasiz. O‘sha o‘yinda o‘zgarishlar bo‘ladimi?

— Futbolchilar o‘zgarmaydi, 20 nafar o‘yinchi qaydnomadan joy oladi. Lekin qanaqa o‘yin ko‘rsatishimizni vaqt ko‘rsatadi.

«Navbahor» PFK matbuot xizmati.