Ademola Lukman "Atalanta" bilan mashg‘ulotlarga qaytish o‘rniga navbatdagi ta’tilga jo‘nab yubordi.
Avvalroq, "Inter"ga o‘tish istagida bo‘lgan futbolchi ketma-ket ikki marta klub bazasiga kelmagan va mashg‘ulotlarni o‘tkazib yuborgan edi.
Endi esa hujumchi Italiyani tark etib, qo‘shimcha ta’tilga chiqishga qaror qildi, deya xabar bermoqda insayder Alfredo Pedulla.
"Atalanta" rahbariyati futbolchiga katta miqdorda jarima solish bo‘yicha talabnoma tayyorladi. Uning xatti-harakatlari, sabablari va yaqin kunlarda nima bo‘lishidan qat’i nazar, mutlaqo nomaqbul hisoblanadi.
"Inter"ning Lukman bo‘yicha 45 mln yevro miqdoridagi ikkinchi taklifi bonuslar bilan rad etilgach, milanliklar bu miqdorni yana oshirib, so‘ralgan 50 mln yevroga yaqinlashtirishga tayyor ekani xabar qilingandi.
Ertami-kechmi barcha tomonlarni qoniqtiradigan yechim topilishi kutilmoqda.
