Germaniyalik mutaxassis Yoaxim Lyov O‘zbekiston terma jamoasini boshqarmaydi. Bild nashrining xabariga ko‘ra, tajribali mutaxassis O‘zbekiston futbol assotsiatsiyasining taklifini rad etgan.

Avstriyaning oe24 nashri esa ushbu xabarga aniqlik kiritib, O‘FA Yoaxim Lyovni O‘zbekiston terma jamoasi bosh murabbiyi lavozimiga tayinlash maqsadida “maxfiy muzokaralar” olib borganini ma’lum qilgan. Manbaga ko‘ra, ushbu muzokaralarda Germaniyadagi O‘zbekiston elchixonasi vakillari ham ishtirok etgan. Bild nashrining yozishicha, 65 yoshli mutaxassis bir necha kun davomida taklif ustida jiddiy o‘ylab ko‘rgan, biroq yakunda O‘zbekiston futbol assotsiatsiyasining taklifini rad etgan.

Eslatib o‘tamiz, O‘zbekiston terma jamoasi o‘z tarixida ilk bor futbol bo‘yicha Jahon chempionati yo‘llanmasini qo‘lga kiritdi.

Ma’lumot o‘rnida, Yoaxim Lyov 2006 yildan 2021 yilgacha Germaniya terma jamoasini boshqargan. Uning boshqaruvidagi “nemis mashinasi” 2014 yilda Braziliyada o‘tgan Jahon chempionatida chempionlikni qo‘lga kiritgan.