"MYU" yarim himoyachisi Jeydon Sancho va "Roma" rahbariyati o‘rtasida ehtimoliy transfer bo‘yicha muzokaralar davom etmoqda. Bu haqda Football-Italia jurnalistlari xabar bermoqda.
"Qizil iblislar" allaqachon 23 million yevrolik transferga rozilik bergan, ammo rimliklar hozircha futbolchi bilan hamkorlik shartlari bo‘yicha kelisha olmayapti. Vingerni "bo‘rilar" taklif qilgan maosh qoniqtirmaydi. Jeydon o‘zi uchun foydaliroq shartlarga erishmoqchi.
Sanchoning hozirgi maoshi yiliga 15 million yevro atrofida. Italiya klubi bunday xarajatlarni ko‘tara olmaydi.
O‘tgan mavsumda 25 yoshli ingliz Londonning "Chelsi" klubida ijara asosida o‘ynagan edi. U Premyer-ligada 31 ta uchrashuv o‘tkazib, 3 ta gol urdi va 4 ta golli uzatmani amalga oshirdi.
