"Nyukasl" yozda "Liverpul"ga o‘tishi mumkin bo‘lgan hujumchi Aleksandr Isakga o‘rinbosar topdi. Ingliz klubi "Inter"ning yosh iqtidori Franchesko Pio Espositoga e’tibor qaratdi.
Il Messaggero xabariga ko‘ra, "hakkalar" 20 yoshli forvard transferi bo‘yicha "Inter"ga rasmiy taklif berishga tayyorlanmoqda. Qayd etilishicha, Espozitoni "Atalanta" ham kuzatib bormoqda.
Biroq, "neradzurrilar" futbolchini sotmoqchi emas. Joriy yozda klub italiyalik futbolchi uchun "Napoli"ning yirik taklifini rad etib bo‘lgandi.
Espozito o‘tgan mavsum "Spesiya" safida ijara asosida to‘p tepgan edi. Futbolchi 40 ta o‘yinda 19 ta gol va 3 ta golli uzatmani amalga oshira oldi.
