«Monako» klubi sobiq darvozaboni Flavio Roma «PSJ»ning Janluijji Donnarumma bilan xayrlashish qaroriga tanqid bilan baho berdi.

«U haqiqiy qahramon edi, deyarli har bir turnirda yetakchi bo‘ldi, ehtimol chempionatdan tashqari, chunki u yerda hamisha yaxshi o‘ynamagan. Bu g‘alati holat. Shu darajadagi futbolchini, joriy mavsumda “PSJ” g‘alabalarida asosiy o‘rin tutgan darvozabonni chetga surishni tushunish qiyin.

Asosan, gap pul haqida, deb o‘ylayman. Lekin, mening fikrimcha, Donnarumma asosiy shaxs edi. Ha, klub Lyuka Shevalye bilan shartnoma imzoladi – u Liga 1’dagi eng yaxshi darvozabon, juda kuchli. Bu jihatdan “PSJ” to‘g‘ri ish qildi. Lekin Donnarummadan bunday osonlikcha voz kechishni tushunish qiyin. Menimcha, u bu yil shartnomaga arzigandi. Ammo “PSJ” unga eshikni ko‘rsatdi.

Menimcha, gap oyoq bilan o‘ynashda ham emas. Agar siz bu yil 4 ta trofey yutgan bo‘lsangiz, bu uning qo‘llari tufayli, oyoqlari emas. Oyoq bilan o‘ynash – bu bahona, xolos. Ha, Shevalye oyoq bilan yaxshiroq o‘ynaydi, ammo bu faqat bahona, boshqa gap yo‘q», – dedi «Monako»ning sobiq darvozaboni.