«Монако» клуби собиқ дарвозабони Флавио Рома «ПСЖ»нинг Жанлуижжи Доннарумма билан хайрлашиш қарорига танқид билан баҳо берди.

«У ҳақиқий қаҳрамон эди, деярли ҳар бир турнирда етакчи бўлди, эҳтимол чемпионатдан ташқари, чунки у ерда ҳамиша яхши ўйнамаган. Бу ғалати ҳолат. Шу даражадаги футболчини, жорий мавсумда “ПСЖ” ғалабаларида асосий ўрин тутган дарвозабонни четга суришни тушуниш қийин.

Асосан, гап пул ҳақида, деб ўйлайман. Лекин, менинг фикримча, Доннарумма асосий шахс эди. Ҳа, клуб Люка Шевалье билан шартнома имзолади – у Лига 1’даги энг яхши дарвозабон, жуда кучли. Бу жиҳатдан “ПСЖ” тўғри иш қилди. Лекин Доннаруммадан бундай осонликча воз кечишни тушуниш қийин. Менимча, у бу йил шартномага арзиганди. Аммо “ПСЖ” унга эшикни кўрсатди.

Менимча, гап оёқ билан ўйнашда ҳам эмас. Агар сиз бу йил 4 та трофей ютган бўлсангиз, бу унинг қўллари туфайли, оёқлари эмас. Оёқ билан ўйнаш – бу баҳона, холос. Ҳа, Шевалье оёқ билан яхшироқ ўйнайди, аммо бу фақат баҳона, бошқа гап йўқ», – деди «Монако»нинг собиқ дарвозабони.