O‘zbekiston terma jamoasi bosh murabbiyi vazifasini vaqtinchalik bajaruvchi Temur Kapadze milliy jamoamizga Pablo Bentuning tayinlanishi mumkinligi haqidagi xabarga o‘z munosabatini bildirdi.

"Ayni paytda terma jamoamiz bilan "Do‘stlik"dagi yangi bazamizda mashg‘ulotlarni o‘tkazyapmiz. Pablo Bentuning Toshkentga kelganini ko‘rdik. Ushbu murabbiy bilan qanchalik kelishuvga erishilganidan xabarimiz yo‘q. Hammamiz uchun eng asosiysi — Vatan jamoasi. Agar Bentu boshqaradigan bo‘lsa, xayrli bo‘lsin, deyman. Biz hamisha milliy jamoamizni qo‘llab-quvvatlaymiz. Bu yerdagi shunchaki nom uchun emas, bosh murabbiy kim bo‘lishidan qat’i nazar Vatan jamoasini qo‘llab-quvvatlaymiz. Ha birimiz jamoamizga muxlislik qilishimiz kerak.

Internet tarmoqlaridagi turli gap-so‘zlarni ko‘ryapman. Meni qo‘llab-quvvatlayotganlarga rahmat aytaman. Ulardan Alloh rozi bo‘lsin.

Rahbariyat, tajribali, jahon chempionatini ko‘rgan murabbiy bilan birga ishlash niyatida. Balki, bu yaxshilikka bo‘lishi mumkin. Jahon chempionatida orttirilgan tajriba ahamiyatga ega bo‘lishi mumkin. Biz ham qo‘ldan kelgancha har doim yordamlashamiz. Qolganini vaqt ko‘rsatadi.

Nima bo‘lganda ham, meni qo‘llab-quvvatlagan muxlislarga rahmat aytaman. Rahbariyat qanday qaror qabul qilsa, buni qo‘llab-quvvatlash kerak. Buni jiddiy tanqid qilish kerak emas. Jahon chempionatiga ko‘p vaqt qolmadi. Biz Mundialda ilk marta ishtirok etamiz. Aksincha, futbolchilarga yaxshi energiya va yaxshi kayfiyat berishimiz zarur.

Xudoga shukur, qisqa vaqt davomida bo‘lsa ham Milliy jamoani boshqardim. Xalqimizning 34 yillik orzusi amalga oshdi. Bundan barchamiz xursandmiz. O‘ylaymanki, yaxshilikka bo‘ladi. Muhimi — terma jamoamiz kuchli bo‘lsin, o‘z o‘rniga ega bo‘lsin, xalqimiz bundan xursand bo‘lsin", — dedi Kapadze.