Londonning «Arsenal» klubi bosh murabbiyi Mikel Arteta jamoaning asosiy himoyachisi, fransuz futbolchisi Vilyam Saliba «Liverpul»ga qarshi Angliya Premyer-ligasi 3-turi uchrashuvida olgan jarohati haqida fikr bildirdi. Bellashuv 0:1 hisobida yakunlandi. Saliba 5-daqiqadayoq maydonni tark etdi.

Arteta shunday dedi:

«U chigilyozdi mashg‘ulot paytida to‘piqdan jarohat oldi va o‘ynay olishini aytdi, lekin birinchi ikkita epizoddayoq u qiynalayotganini ko‘rdim va afsuski, uni maydondan olishimizga to‘g‘ri keldi. Yaxshiki, bizda Moskera bor — uni ilk bor Premyer-ligada maydonga tushirdik. Uning debyuti «Enfild»da kutganimizdek sharoitda bo‘lmadi, ammo menimcha, u juda yaxshi o‘ynadi. Salibaning jarohati meni xavotirga solyapti, chunki bunday darajadagi o‘yinlarda biror muammo bo‘lsa, o‘ynash mumkin emas. U harakat qildi, demak muammo jiddiy».

24 yoshli Saliba joriy mavsumda APLda 3 ta o‘yinda maydonga tushdi, ammo hali statistik ko‘rsatkichlari yo‘q.