FIFA "CAFA Nations Cup" musobaqasini qo‘llab-quvvatlash bo‘yicha yangi majburiyatlarini e’lon qildi.

Markaziy Osiyo Futbol Assosiasiyasi (CAFA) tomonidan tashkil etilgan ushbu ikki yilda bir o‘tkaziladigan turnirning 2025 yilgi bosqichi Tojikiston va O‘zbekiston mezbonligida o‘tmoqda. Musobaqada 8 ta milliy jamoa ishtirok etadi.

Shu bilan birga, 2026 yilgi Jahon chempionatida qatnashadigan ikki terma jamoa ham ishtirokchilar qatorida.

Jami 14 ta uchrashuv o‘tkazilib, final 8 sentyabr, dushanba kuni Toshkentda bo‘lib o‘tadi.

FIFA bosh kotibi Mattias Grafstryom shunday dedi:

“CAFA Nations Cup kabi musobaqalar jamoalarga o‘zaro raqobat qilish va futboldan bahra olish uchun qimmatli imkoniyatlarni beradi. FIFA bunday tadbirlarni qo‘llab-quvvatlashga sodiq. Biz konfederasiyalar, mintaqaviy assosiasiyalar va FIFA a’zolari bilan birgalikda milliy jamoalar hamda klublar o‘rtasida yanada raqobatbardosh uchrashuvlarni tashkil etish yo‘llarini izlaymiz. FIFA CAFA bilan birga ushbu musobaqani rivojlanish va unutilmas lahzalardan zavq olish maydoniga aylantirayotganidan faxrlanadi”.

2023 yildagi ilk bosqichdan keyin turnir 8 ta milliy jamoaga kengaydi:

- 6 ta CAFA a’zosi
- 2 ta taklif etilgan jamoa (O‘mon va Hindiston).

CAFA o‘zining 10 yillik yubileyini nishonlar ekan, musobaqa nafaqat Markaziy Osiyoda, balki mintaqadan tashqarida ham katta media e’tiboriga sazovor bo‘lishi kutilmoqda.

Mezbonlardan biri bo‘lgan O‘zbekiston tarixda ilk bor Jahon chempionatiga yo‘llanma oldi va endilikda turnirda Eron bilan birgalikda yuqori darajadagi raqobatni ta’minlaydi.

FIFAning qo‘llab-quvvatlash siyosati

- Bu qadam FIFAning 2023–2027 yillarga mo‘ljallangan “Global o‘yin uchun strategik maqsadlari” dasturidagi 7-maqsadga asoslanadi.

- 2026 yilgacha FIFA Forward 3.0 doirasida CAFA kabi mintaqaviy assosiasiyalarga har yili 5 mln dollar ajratiladi.

- FIFAning iste’dodlarni rivojlantirish dasturi va ayollar futboli rivoji dasturi ham mintaqada futbol taraqqiyotiga hissa qo‘shadi.

CAFA so‘nggi yillarda nafaqat erkaklar uchun, balki turli yosh toifalarida va ayollar futbolida ham qator musobaqalarni tashkil etib, Markaziy Osiyoda futbolni yanada ommalashtirishda yetakchi rol o‘ynamoqda.