Bilbaoning «Atletik» klubi o‘z rasmiy saytida himoyachi Emerik Laportning «An-Nasr»dan transferi amalga oshmay qolgani yuzasidan rasmiy bayonot chiqardi. Avvalroq, tarbiyalanuvchisi hisoblangan futbolchining basklar klubiga qaytishi Saudiya klubining hujjatlarni o‘z vaqtida yubormagani sababli amalga oshmay qolgani xabar qilingan edi.

«FIFA hozircha Xalqaro transfer sertifikati (CTI)ni rasmiylashtirishni rad etdi, shuning uchun Laport «Atletik»ka ro‘yxatdan o‘tkazilishi mumkin emas.

«Atletik» o‘z a’zolari va muxlislariga ma’lum qiladiki, Ispaniya futbol federasiyasi (RFEF) FIFAga Saudiya Arabistoni futbol federasiyasidan Laportning o‘tishi uchun CTI olish maqsadida murojaat qilgan, ammo rad javobi olgan».

Hodisalar xronologiyasi:

1. 1 sentyabr kuni, transfer oynasi doirasida, Laport, «An-Nasr» klubi va «Atletik» o‘yinchining transferi bo‘yicha kelishuvga erishishdi.

2. O‘sha kuniyoq «Atletik» FIFAning TMS platformasiga (transferlarni muvofiqlashtirish tizimi) so‘rov yuklab qo‘ydi, ammo klubga bog‘liq bo‘lmagan sabablarga ko‘ra jarayon to‘liq yakunlanmadi.

3. 2 sentyabr kuni RFEF FIFAga maxsus holat sifatida belgilangan tartibga istisno qilish, Saudiya Arabistoni futbol federasiyasidan CTI olish va futbolchini «Atletik»ka ro‘yxatdan o‘tkazish so‘rovi bilan murojaat qildi.

4. 3 sentyabr kuni RFEF «Atletik»ni FIFA ushbu so‘rovni rad etgani va hozircha CTI olish imkoni yo‘qligi haqida yozma ravishda xabardor qildi.

«An-Nasr» klubi, futbolchi va «Atletik» o‘rtasidagi kelishuvni amalga oshirish ustida ishni davom etmoqda va amaldagi qonun doirasida barcha imkoniyatlarni ko‘rib chiqmoqda. Agar o‘tish amalga oshmasa, avval erishilgan kelishuvlar kuchini yo‘qotadi va klub moliyaviy majburiyatlarga duch kelmaydi — bu «Atletik», «An-Nasr» va futbolchi o‘rtasidagi shartnomalarda belgilangan shart hisoblanadi. «Atletik» ochiqlikka sodiqligini ta’kidlaydi va barcha yechim yo‘llari tugagach, keng qamrovli izoh taqdim etishga va’da berdi», — deyiladi bayonotda.

Emerik Laport 2018 yil yanvar oyida «Atletik»ni tark etib, 65 million yevro evaziga «Manchester Siti»ga o‘tgan edi. 2023 yilning avgust oyida esa ispaniyalik himoyachi «An-Nasr» klubiga ko‘chib o‘tdi. U yerda portugaliyalik yulduz Krishtianu Ronaldu ham to‘p suradi.