Italiya terma jamoasining sobiq hujumchisi Mario Balotelli karyerasini davom ettirish imkoniyatlarini kutayotgan paytda bolalarga mashg‘ulot o‘tmoqda. Bu haqda La Gazzetta dello Sport nashri xabar berdi.
"Inter", "Milan", "Liverpul" va "Manchester Siti" klublarining sobiq hujumchisi 2023 yilda mast holda transport vositasini boshqargani uchun jamoat ishlariga jalb qilinganidan keyin bolalarga futbol o‘ynashni o‘rgatishni boshlagandi. Nashr ma’lumotlariga ko‘ra, italiyalik futbolchiga bu mashg‘ulotlar yoqib qolgan va endi u jismoniy holatini saqlab qolish maqsadida ularni davom ettirmoqda.
Balotellining faoliyatidagi so‘nggi klubi "Jenoa" bo‘lib qolmoqda. Yozda hujumchiga nisbatan Italiya D Seriyasi (to‘rtinchi liga) vakili "Paviya" qiziqish bildirganlik haqida ma’lumotlar tarqalgan edi.
