"Manchester Yunayted"ning sobiq yarim himoyachisi, hozirda futbol murabbiyi bo‘lib ishlayotgan Maykl Karrik Shotlandiya chempionatida ish boshlashi mumkin. Bu haqda Daily Mail jurnalistlari xabar bermoqda.

Manbaga ko‘ra, mutaxassisni "Glazgo Reynjers" klubi bosh murabbiylikka taklif qilmoqchi. Avvalroq shotlandiyaliklar "Liverpul" afsonasi Stiven Jerrardni jamoa boshqaruviga taklif qilishni rejalashtirgan edi, biroq murabbiy faoliyatini davom ettirishning bunday variantidan voz kechdi.

Karrikning so‘nggi ish joyi "Midlsbro" edi. O‘tgan mavsum yakunlangach, mutaxassis jamoani tark etdi.

Bugungi kunga kelib "Reynjers" Shotlandiya chempionati jadvalida atigi sakkizinchi o‘rinda bormoqda.