Bahraynda bo‘lib o‘tayotgan yoshlar o‘rtasidagi Osiyo o‘yinlari O‘zbekiston futzal "A" guruhida 2-o‘rinni egallab, yarim final yo‘llanmasini qo‘lga kiritdi.

Xitoy 3-turda Afg‘onistonga 1:3 hisobida imkoniyatni boy bergach, O‘zbekistonga yarim finalga chiqish uchun nazariy imkoniyat yuzaga keldi. Buning uchun Dilshod Rahmatov shogirdlari Bahraynni 11 ta to‘p farqi bilan mag‘lub etish talab etilardi.

Yoshlarimiz bu ishni a’lo darajada uddalashdi. Ayniqsa, uchrashuvning ilk daqiqasidayoq O‘zbekiston raqib darvozasini 3 marta ishg‘ol qilishi oqibatida yigitlarda o‘ziga bo‘lgan ishonch ortdi. Jamoamiz tanaffusga qadar 10:0 hisobida oldinga o‘tib oldi.

Ikkinchi bo‘limda o‘zbekistonliklar raqib darvozasiga yana 3 marta yo‘l topishdi va yakunda 13:0 hisobida g‘alaba qozonishdi.

Shu tariqa, O‘zbekiston 4 ochko bilan "A" guruhida 2-pog‘onani band etdi (to‘plar farqi — 17:12).

O‘zbekiston yarim finalda "B" guruhi g‘olibi Eronga qarshi maydonga chiqadi. Bu bahs 28 oktyabr kuni 18:00da boshlanadi. Ikkinchi yarim final o‘yini Afg‘oniston va Tailand o‘rtasida kechadi.

Yoshlar o‘rtasida Osiyo o‘yinlari.
Futzal. "A" guruhi, 3-tur
BAHRAYN - O‘ZBEKISTON - 0:13
Gollar:
(0'18") ILYOSOV Abdulboriy
(0'29") ZIYOXIDINOV Nizomiddin
(0'52") JALOLIDDINOV Azizbek
(5'47") ILYOSOV Abdulboriy
(12'00") AYTBOYEV Izzat
(12'09") AYTBOYEV Izzat
(12'19") QALLIBEKOV Timur
(14'55") MUBARAK Ammar (avtogol)
(15'24") ZIYOXIDINOV Nizomiddin
(16'36") G‘ULOMOV Izzatilla
(22'54") ZIYOXIDINOV Nizomiddin
(33'16") G‘ULOMOV Izzatilla
(34'33") ILYOSOV Abdulboriy