Janubiy Koreya terma jamoasi sardori Son Hyon Min faoliyatini Ispaniya La Ligasida davom ettirishi mumkin. Fichajes nashri xabariga ko‘ra, futbolchiga Kataloniyaning “Barselona” klubi jiddiy qiziqish bildirmoqda.

Manbaga ko‘ra, “ko‘k-anorranglilar” futbolchini AQSHning “Los-Anjeles” klubidan ijaraga olish orqali hujum chizig‘ini kuchaytirmoqchi. Bu transfer Son uchun ham foydali bo‘lishi mumkinligi aytilmoqda. Chunki futbolchi 2026-yilgi Jahon chempionati oldidan sport formasini saqlab qolish uchun kuchliroq klub bilan shartnoma imzolashga qarshi emas.

“Los-Anjeles” rahbariyati Sonni ijaraga berishga qarshi emas. Sababi futbolchi hamda klub o‘rtasidagi shartnomada hujumchi Yevropada qisqa muddat ijarada o‘ynash imkonini beruvchi band mavjud. Kataloniyaliklar esa aynan shu bandni faollashtirib, futbolchini o‘z safiga qo‘shib olmoqchi.

Kataloniya klubi rahbariyati bu transferni strategik jihatdan muhim qadam sifatida baholamoqda. Sonning kelishi “Barselona”ning Osiyodagi mashhurligini oshirish bilan birga, jamoaning hujumdagi imkoniyatlarini ham kengaytiradi. Shuningdek, futbolchi qanotda ham, markazda ham samarali o‘ynay oladi. Shu sababdan “Tottenhem” sobiq yetakchisi jarohatlar bilan kurashayotgan Robert Levandovski o‘rnini vaqtincha to‘ldirishi mumkinligi aytilmoqda.

Ma’lumot o‘rnida shuni ta’kidlash kerakki, agar bitim amalga oshsa, Son Hyon Min “Barselona”ning asosiy jamoasi safida maydonga tushgan ilk janubiy koreyalik futbolchi bo‘ladi.

32 yoshli Son Hyon Min joriy masvum MLS doirasidagi 10 uchrashuvda maydonga tushib, o‘z hisobiga 9 ta gol hamda 2 ta golli uzatma yozdirib qo‘ygan. Uning “Los-Anjeles” bilan shartnomasi 2027-yilning oxiriga qadar amal qiladi. Transfermarkt portali hujumchining qiymatini 20 million yevroga baholamoqda.