O‘zbekiston terma jamoasining sobiq bosh murabbiyi, hozirda esa yordamchi murabbiy sifatida faoliyat yuritayotgan Temur Kapadze Indoneziya terma jamoasiga bosh murabbiy bo‘lishi mumkinligi haqidagi xabarlarga izoh berdi.

“Qayerga nima joylasam, Instagram’da bo‘ladimi yoki boshqa joydami hammasi xabarlarga to‘lib ketdi. Menimcha, hozir Indoneziyadagi turli telekanallar va nashrlarda nomzodlar haqida gap ketayapti. Ularning orasida mening ismim ham tilga olinmoqda. Indoneziya to‘sig‘idan o‘tib, Olimpiada yo‘llanmasiga ega chiqqanimiz, Osiyo o‘yinlarida bronza medalini qo‘lga kiritganimiz va Jahon chempionatida ishtirok etishimiz  — ushbu natijalar ortidan ular mening nomzodimga qiziqish bildiryapti deb o‘ylayman.

Hozir u yerdagilar bizning mediamizni ham kuzatishayapti. Menga yozishyapti: ‘Keling, keling‘ yoki ‘Taklif tushdimi?’ deb so‘rashayapti”, dedi Kapadze “Sport TV” telekanalidagi “Gol” dasturida.

Eslatib o‘tamiz, avvalroq Indoneziya futbol federasiyasi yaqinda iste’foga chiqarilgan niderlandiyalik mutaxassis Patrik Klyuyvert o‘rniga munosib nomzod qidirayotgani hamda Kapadze jamoani boshqarishga asosiy nomzodlardan bir ekanligi xabar qilingan edi.

Ma’lumot o‘rnida, Temur Kapadze 2025 yil yanvar oyida O‘zbekiston milliy terma jamoasi bosh murabbiyligiga tayinlangan va uning qo‘l ostida jamoa 2026-yilgi Jahon chempionatiga yo‘llanma olgan edi. Joriy yilning 6 oktyabr sanasida uning o‘rniga italiyalik mutaxassis Fabio Kannavaro bosh murabbiy etib tayinlandi.