O‘zbekiston terma jamoasi bosh murabbiyi Fabio Kannavaro Turkiya Superligasi 11-turidan o‘rin olgan “Bashakshehir” hamda “Kojaelispor” jamoalari o‘rtasidagi uchrashuvni bevosita stadiondan tomosha qildi. Unda italiyalik mutaxassisga Abbosbek Fayzullayev hamrohlik qildi.

Mazkur bellashuvda “Bashakshehir” 1:0 hisobida g‘alaba qozondi. O‘yindagi yagona golni o‘zbekistonlik hujumchi Eldor Shomurodov kiritdi. Uchrashuvdan keyingi matbuot anjumanida “Bashakshehir” ustozi Nuri Shahin o‘yin haqida gapirar ekan, Fabio Kannavaroning uchrashuvni tomosha qilish uchun kelgani haqida to‘xtaldi.

“O‘zbekiston bosh murabbiyi Fabio Kannavaro “Bashakshehir”dagi o‘zbek futbolchilarni kuzatish uchun keldi. O‘yindan so‘ng yonimizga kirib, tabrikladi, bir oz suhbatlashdik. Bu o‘g‘lim uchun ham esda qolarli lahza bo‘ldi. Sababi u Kannavaro bilan suratga tushdi. Unga ham, O‘zbekiston terma jamoasiga ham Jahon chempionatida omad tilayman”, dedi Shahin.

Ma’lumot o‘rnida, ayni paytda Nuri Shahin boshchiligidagi “Bashakshehir” 13 ochko bilan turnir jadvalida 9-o‘rinni egallab turibdi. Jamoa Superliganing navbatdagi turida “Genchlerbirligi” klubiga qarshi maydonga tushadi. Mazkur bellashuv 7 noyabr kuni bo‘lib o‘tadi.