Ўзбекистон терма жамоаси бош мураббийи Фабио Каннаваро Туркия Суперлигаси 11-туридан ўрин олган “Башакшеҳир” ҳамда “Кожаэлиспор” жамоалари ўртасидаги учрашувни бевосита стадиондан томоша қилди. Унда италиялик мутахассисга Аббосбек Файзуллаев ҳамроҳлик қилди.

Мазкур беллашувда “Башакшеҳир” 1:0 ҳисобида ғалаба қозонди. Ўйиндаги ягона голни ўзбекистонлик ҳужумчи Элдор Шомуродов киритди. Учрашувдан кейинги матбуот анжуманида “Башакшеҳир” устози Нури Шаҳин ўйин ҳақида гапирар экан, Фабио Каннаваронинг учрашувни томоша қилиш учун келгани ҳақида тўхталди.

“Ўзбекистон бош мураббийи Фабио Каннаваро “Башакшеҳир”даги ўзбек футболчиларни кузатиш учун келди. Ўйиндан сўнг ёнимизга кириб, табриклади, бир оз суҳбатлашдик. Бу ўғлим учун ҳам эсда қоларли лаҳза бўлди. Сабаби у Каннаваро билан суратга тушди. Унга ҳам, Ўзбекистон терма жамоасига ҳам Жаҳон чемпионатида омад тилайман”, деди Шаҳин.

Маълумот ўрнида, айни пайтда Нури Шаҳин бошчилигидаги “Башакшеҳир” 13 очко билан турнир жадвалида 9-ўринни эгаллаб турибди. Жамоа Суперлиганинг навбатдаги турида “Генчлербирлиги” клубига қарши майдонга тушади. Мазкур беллашув 7 ноябрь куни бўлиб ўтади.