Italiya chempionatining o‘ninchi turidan o‘rin olgan safar uchrashuvida Turinning «Yuventus» jamoasi «Kremoneze»ni 2:1 hisobida mag‘lub etdi. Bu natija haqida «keksa sinyora» bosh murabbiyi Luchano Spalletti fikr bildirdi.
«Jamoa uchrashuvning birinchi yarmining katta qismini yaxshi o‘tkazdi. Bizda yetarlicha golli imkoniyatlar bo‘ldi, endi faqat ularni amalga oshirish ustida ishlashimiz kerak. Jamoada katta salohiyat bor», — deb italiyalik mutaxassisning so‘zlarini klub matbuot xizmati keltirgan.
«Byankonerilar» 18 ochko jamg‘argan holda A Seriya jadvalida beshinchi o‘rinni egallab turibdi. Spalletti shogirdlari yetakchi «Napoli»dan to‘rt ochkoga ortda qolmoqda.
