Elit Osiyo chempionlar ligasi 4-turi doirasida Qarshidagi «Markaziy» stadionda kechgan «Nasaf» - «Al-Vahda» uchrashuvi g‘oyat dramatik ruhda o‘tdi.

Muxlislarining katta qo‘llab-quvvatlovi ostida maydonga tushgan "ajdarlar" ilk daqiqalardanyoq faol harakat qildi. 12-daqiqada uchrashuvga kelgan muxlislar jamoaning sadoqatli ishqibozi — marhum Mahmud Muhammadiyev xotirasini bir daqiqa sukut bilan yod etishdi. Bu holat stadiondagi muhitni yanada ehtirosli qildi.

Birinchi bo‘lim so‘ngiga yaqin «Nasaf» ustunlikka erishdi — 42-daqiqada Sardorbek Bahromovning shiddatli va aniq zarbasi raqib darvozasini yo‘l oldi. Bu gol haqiqiy shedevr sifatida baholandi — Bahromov to‘pni uzoq masofadan darvoza burchaklaridan biriga joyladi. Birinchi bo‘lim 1:0 hisobida yakunlandi.

Ikkinchi taym boshlanishi bilan «Al-Vahda» javob hujumlarini kuchaytirdi va 59-daqiqada nigeriyalik hujumchi Ogbu hisobni tenglashtirdi — 1:1. Bu goldan keyin «Nasaf» jamoasi tarkibida bir qator almashinuvlar amalga oshirildi: Otubanjo, Golban va Bozorov maydonga tushdi.

76-daqiqada "Nasaf" futbolchisi Shala juda yaqin masofadan darvoza tomon aniq zarba bera olmadi. Har ikkala jamoa g‘alaba uchun harakat qilishda davom etdi. Omad esa o‘yin so‘nggida BAA jamoasiga kulib boqdi. 89-daqiqada "standart"dan so‘ng Kayo Kanedo jamoasining g‘alaba golini urdi — 1:2.

Qarshiliklar qolgan daqiqalarda hisobni tenglashtirishga urinishdi, ammo mehmonlar himoyada ehtiyotkorlik bilan harakat qildilar va ustunlikni saqlab qolishdi.

Uchrashuvni 3255 nafar tomoshabin stadiondan kuzatdi. «Nasaf» 1:2 hisobida mag‘lub bo‘ldi, ammo kurashchan o‘yin ko‘rsatdi.

Elit Osiyo chempionlar ligasi. 4-tur.
"Nasaf" (Qarshi) — "Al-Vahda" (Abu-Dabi) — 1:2
Gollar: Bahromov (42) — Ogbu (59), Kanedo (89).
Stadion: «Markaziy», Qarshi. 3255 nafar tomoshabin