Chempionlik sari yaqinlashib borayotgan "Neftchi" klubi Superliganing 28-turi doirasida mehmon sifatida «Buxoro»ga qarshi bahs olib bordi.

Uchrashuv ilk daqiqalaridanoq kuchli kurash muhitida o‘tdi. Har ikki jamoa hujumkor uslubda harakat qildi, ammo dastlabki bo‘limda gol qayd etilmadi.

13-daqiqada mezbonlar xavfli hujum uyushtirishdi, ammo zarba noaniq chiqdi. 26-daqiqada Ikrom Aliboyevning olis masofadan yo‘llagan zarbasi ozgina noaniq ketdi. 40-daqiqada Abror Ismoilov yaxshi imkoniyatga ega bo‘ldi, ammo uning zarbasini darvozabon qaytardi. Birinchi bo‘lim yakunida hisob 0:0 ko‘rinishida saqlanib qoldi.

Ikkinchi taym boshlanishi bilan farg‘onaliklar faollikni oshirishdi. 48-daqiqada Yovan Jokichning bosh bilan bergan zarbasi noaniq chiqdi, bir necha daqiqadan so‘ng esa «Neftchi» hisobni ochdi. Vladimir Yovovichning aniq zarbasi jamoani oldinga olib chiqdi — 0:1.

Biroq 58-daqiqada mehmonlar tarkibida jiddiy yo‘qotish yuz berdi: Ikrom Aliboyev ikkinchi ogohlantiruvdan so‘ng maydondan chetlatildi. Shu paytdan boshlab farg‘onaliklar bir kishi kam bo‘lib harakat qilishdi.

Shunga qaramasdan, «Neftchi» himoyada jips o‘yin ko‘rsatdi, bir necha bor xavfli qarshi hujumlar uyushtirdi. Ammo 82-daqiqada «Buxoro»ning bosimi o‘z samarasini berdi — Yasim Tomashevichning uzatmasidan so‘ng Dominik Begich hisobni tenglashtirdi (1:1).

Uchrashuv so‘nggi daqiqalarida har ikki jamoa g‘alaba uchun harakat qildi, ammo hisob o‘zgarmadi.

Natijada chempionlik uchun kurash keskinlashdi. Lekin, hamon barcha narsa "Neftchi"ning qo‘lida. Jamoa qolgan 2 ta o‘yinda g‘alaba qozonishi shart.

Superliga, 28-tur
«Buxoro» — «Neftchi» 1:1
7 noyabr, Buxoro. "Buxoro" akademiyasi stadioni
Gollar: Begich (82) — Yovovich (51)
Ogohlantirishlar: Marushich (31), Tomashevich (50)
Chetlatish: Aliboyev (58)
Hakam: Asker Najafaliyev