Чемпионлик сари яқинлашиб бораётган "Нефтчи" клуби Суперлиганинг 28-тури доирасида меҳмон сифатида «Бухоро»га қарши баҳс олиб борди.

Учрашув илк дақиқалариданоқ кучли кураш муҳитида ўтди. Ҳар икки жамоа ҳужумкор услубда ҳаракат қилди, аммо дастлабки бўлимда гол қайд этилмади.

13-дақиқада мезбонлар хавфли ҳужум уюштиришди, аммо зарба ноаниқ чиқди. 26-дақиқада Икром Алибоевнинг олис масофадан йўллаган зарбаси озгина ноаниқ кетди. 40-дақиқада Аброр Исмоилов яхши имкониятга эга бўлди, аммо унинг зарбасини дарвозабон қайтарди. Биринчи бўлим якунида ҳисоб 0:0 кўринишида сақланиб қолди.

Иккинчи тайм бошланиши билан фарғоналиклар фаолликни оширишди. 48-дақиқада Йован Жокичнинг бош билан берган зарбаси ноаниқ чиқди, бир неча дақиқадан сўнг эса «Нефтчи» ҳисобни очди. Владимир Йововичнинг аниқ зарбаси жамоани олдинга олиб чиқди — 0:1.

Бироқ 58-дақиқада меҳмонлар таркибида жиддий йўқотиш юз берди: Икром Алибоев иккинчи огоҳлантирувдан сўнг майдондан четлатилди. Шу пайтдан бошлаб фарғоналиклар бир киши кам бўлиб ҳаракат қилишди.

Шунга қарамасдан, «Нефтчи» ҳимояда жипс ўйин кўрсатди, бир неча бор хавфли қарши ҳужумлар уюштирди. Аммо 82-дақиқада «Бухоро»нинг босими ўз самарасини берди — Ясим Томашевичнинг узатмасидан сўнг Доминик Бегич ҳисобни тенглаштирди (1:1).

Учрашув сўнгги дақиқаларида ҳар икки жамоа ғалаба учун ҳаракат қилди, аммо ҳисоб ўзгармади.

Натижада чемпионлик учун кураш кескинлашди. Лекин, ҳамон барча нарса "Нефтчи"нинг қўлида. Жамоа қолган 2 та ўйинда ғалаба қозониши шарт.

Суперлига, 28-тур
«Бухоро» — «Нефтчи» 1:1
7 ноябрь, Бухоро. "Бухоро" академияси стадиони
Голлар: Бегич (82) — Йовович (51)
Огоҳлантиришлар: Марушич (31), Томашевич (50)
Четлатиш: Алибоев (58)
Ҳакам: Аскер Нажафалиев