"Bavariya" prezidenti Gerbert Xaynerning fikricha, Tomas Myuller uning o‘rnini egallashi mumkin.

36 yoshli yarim himoyachi hozirda MLSning "Vankuver Uaytkeps" jamoasida to‘p tepmoqda. U o‘tgan yozda shartnomasi yakunlangach, 18 mavsumdan so‘ng "Bavariya"ni tark etgandi.

"U klub faoliyatida ishtirok etishi, elchi bo‘lishi mumkin. Va u, albatta, mening o‘rnimga ham da’vogarlik qilishga haqli.

U klubni yaxshi biladi. U aqlli, ziyrak yigit, endi uning xalqaro tajribasi bor.

U yana "Bavariya"da, istalgan lavozimda ishlay olishini istardim," - dedi Xayner Abendzeitung nashriga bergan intervyusida.

Myullerning o‘zi hozircha klubga qaytish haqida o‘ylamayapti, deb yozadi Zeit. "Bularning barchasi uydirma," - degandi u bir necha hafta oldin Bavariya radiosi efirida. Hozircha futbolchi murabbiylik yoki rahbarlik lavozimini egallashni xohlash-xohlamasligini hal qilgani yo‘q.